Betűhív átirat:

Volek ſyrolm thudothlon ſy
rolmol ſepedyk· buol oʒuk
epedek· Walaſth vylagum
tul ſydou fyodumtul eʒes
urumētuul· O en eſes urodū
eggen yg fyodumx ſyrou a/
/ niath thekunched buabeleul
kyniuhhad· Scemem kunuel
arad en iunhum buol farad/
the werud hullothya en iū /
/ hum olelothya Vylag uila
ga viragnak uiraga· keſeru /
/ en kynʒathul/ uoſ ſcegegkel
werethul· Vh nequem en
fyon eʒes meʒuul/ Scege
/ nul ſcepſegud wirud hioll
wyʒeul· Syrolmom fuha
/ʒatum therthetyk kyul en
iumhumnok bel bua qui
ſumha nym kyul hyul·
Wegh halal engumet/ egge/
dum illen/ maraggun uro
dum/ kyth wylag felleyn·
O ygoʒ ſymeonnok/ beʒʒeg
ſcouuo ere en erʒem eʒ bu/
thuruth/ kyt niha egyre·
Tuled ualmun / de num
ualallal/ hul yg kynʒaſſal/
fyom halallal· Sydou
myth theʒ turuentelen/
fyom merth hol byuntelen/
fugwa/ huʒtuʒwa wklel/
/ ue/ kethwe/ ulud· Kegug
/ gethuk fyomnok/ ne leg
kegulm mogomnok/ owog
halal kynaal/ anyath eʒes
fyaal/ egembelu ullyetuk·